कविता: बेसार

कविता: बेसार

आजकल देशभर

राजनीतिक सर्कलमा

नेतादेखि कार्यकर्तासम्म

जनतादेखि मालिकसम्म

राजनीतिक हल्ला बढेको छ

बेसारको चर्चा चलेको छ ।

आजकल यताउता

सबै परिवेशमा

गाउँदेखि शहरसम्म

हिमालदेखि पहाड र तराईसम्म

रंगको हल्ला बढेको छ

बेसारको चर्चा चलेको छ ।

आजकल जताततै

सामाजिक संजालमा

फेसबुकदेखि ट्वीटरसम्म

पत्रिकादेखि अनलाईनसम्म

नानाथरी हल्ला बढेको छ

बेसारको चर्चा चलेको छ ।

बेसार चम्किलो छ

टाढैदेखि देखिने बनेको छ

सबैको नजरमा परेको छ

बेसार पहेंलो छ

आफ्नै चमकमा

चम्किलो बनेको छ।

बेसार सर्वगुणी छ

तरकारीदेखि अचारसम्म

पूजादेखि भुजासम्म

झुपडीदेखि महलसम्म

सबैतिर आफ्नो अस्तित्व देखाएको छ

सबैतिर प्रभाव छोडेको छ।

बेसार बेसारे छ

सबै दलको नेताको भाषणमा परेको छ

उत्तर दक्षिण दुवै तिर घुमेको छ

सबै संग आफ्नो रंग मिलाएको छ

जानी नजानी आफ्नो रजाई गरेको छ

आफ्नै रंग पनि सबैलाई देखाएको छ।

आजकल बेसार मख्ख छ

जनताको भान्सामा छाएको छ

चर्चाको शिखरमा परेको छ

जनताको खोजाईमा परेको छ

नेताको रोजाईमा परेको छ

सबैको आफ्नै भएको छ।

मैले सुनेको आजकल बेसार

सबैसंग धन्य छ

सबैको प्रशंसामा रमेको छ

अझै चम्किलो र प्रतिरोधात्मक हुने

सबैको प्यारो हुने

प्रतिवद्धता गरेको छ।

सर्वगूणी बेसारलाई

मेरो पनि शुभकामना छ

आफ्नो रंग जस्तै सधैं चम्कनु

कृषकको दाम कमाउनु

प्रयोगकर्ताको शान बढाउनु

आफ्नो नाम बढाउनु।

डा. बच्चुकैलाश कैनी

शनिबार, असार १३, २०७७ (२७ जुन २०२०)

डार्टफोर्ड, बेलायत।