https://nepalbritain.com/?p=163517
डा. कैनी केन्ट काउन्टी काउन्सिलको उम्मेदवार
नेपालब्रिटेन डट कम्३० फाल्गुन २०८१, शुक्रबार २१:१७
लण्डन। डार्टफोर्ड काउन्सिलका पूर्व काउन्सिलर तथा लेबर पार्टीको तर्फबाट सन् २०१७ को संसदीय निर्वाचनमा डार्टफोर्ड निर्वाचन क्षेत्रका उम्मेदवार डा. बच्चु कैलाश कैनी आगामी मे १ मा हुने केन्ट काउन्टी काउन्सिलको निर्वाचनमा डार्टफोर्ड वेस्ट डिभिजनबाट लेबर पार्टीका उम्मेदवार हुने भएका छन्। सन् २०१३ देखि लेबर पार्टीमा सक्रिय डा. कैनी हाल लेबर पार्टी डार्टफोर्ड जिल्ला समितिको कार्यकारी सदस्य र पार्टीको बिएएमई (अश्वेत र अल्पसंख्यक जातीय समुदाय) इन्चार्जको रूपमा कार्यरत छन्। तनहूँमा जन्मेका डा. कैनी र उहाँको परिवार पंचायत कालमा नेपालको प्रजातान्त्रिक आन्दोलनमा समेत सक्रिय थिए।
यो अवसरसँगै डा. कैनी बेलायतको दुई स्थानीय तह—जिल्ला र काउन्टी तथा संसदीय—गरी तिनै स्तरका निर्वाचनमा नेपाली समुदायबाट बेलायतमा उम्मेदवार हुने पहिलो व्यक्ति बनेका छन्। सन् २०१७ को संसदीय निर्वाचनमा पराजित भएता पनि डा. कैनीले सम्मानजनक १८,०२४ मत प्राप्त गर्नु भएको थियो।
बेलायतमा हरेक वर्ष मे महिनाको पहिलो बिहीबार स्थानीय निर्वाचन हुन्छ। देशभरका स्थानीय निकायहरू मध्य हरेक वर्ष केही निकायहरूको निर्वाचन हुन्छ। बेलायतमा निर्वाचित स्थानीय जनप्रतिनिधिको पदावधि चार वर्षको हुन्छ। यस वर्ष सन् २०२५ को मे १ मा १४ काउन्टी काउन्सिलहरू, ८ एकात्मक प्राधिकरणहरू र १ महानगर वा मेट्रोपोलिटन बरो काउन्सिलको निर्वाचन हुँदैछ। निर्वाचनका लागि उम्मेदवारी दाखिला गर्ने मिति २०२५ अप्रिल २ को ४ बजेसम्म रहेको कुरा डा. कैनीले बताउनु भएको छ।
स्मरणीय छ, बेलायतको काउन्टी काउन्सिल स्थानीय निकायको सबैभन्दा माथिल्लो तह हो। करीव १६ लाख १० हजार जनसंख्या भएको केन्ट काउन्टी काउन्सिलमा डार्टफोर्ड सहित बाह्र जिल्ला छन्। बहत्तर डिभिजन रहेको केन्ट काउन्टी काउन्सिलमा डार्टफोर्ड काउन्सिलभित्र छ वटा डिभिजन छन्। यी मध्ये डा. कैनी डार्टफोर्ड वेस्ट डिभिजनबाट लेबर पार्टीको आन्तरिक प्रतिस्पर्धाबाट उम्मेदवार चुनिएका छन्। डार्टफोर्ड वेस्ट डिभिजनमा करिव १७,००० मतदाता छन्।
यस निर्वाचनमा डा. कैनीको मुख्य एजेन्डा स्थानीय पूर्वाधार सुधार गर्ने, स्वास्थ्य र सामाजिक हेरचाह सेवाहरूलाई सुदृढ गर्ने, युवाहरूका लागि शिक्षा र अवसरहरू बढाउने, यातायात सेवाहरू सुदृढ गर्ने, सामाजिक न्यायको प्रवर्द्धन गर्ने, सबैका लागि अवसरहरू सुनिश्चित गर्ने, स्थानीय व्यवसायहरूलाई समर्थन गर्ने, डार्टफोर्डमा आर्थिक विकासलाई अगाडि बढाउने आदि रहेको कुरा डा. कैनीले बताउनु भएको छ।
स्वास्थ्य व्यवस्थापन क्षेत्रमा नेपाल र बेलायतमा ३३ वर्ष भन्दा बढी काम गरेका डा. कैनी हाल बेलायतको एक विश्वविद्यालयमा स्वास्थ्य व्यवस्थापनको सिनियर लेक्चररको रूपमा कार्यरत छन्। सन् २००५ देखि डार्टफोर्डमा बसोबास गर्दै आएका डा. कैनी अस्पताल व्यवस्थापनका चार र नेपाली साहित्यमा छ गरी दश वटा पुस्तकका लेखक पनि हुन्।
डा. कैनीले मे १, २०२५ मा हुने निर्वाचनमा आफ्ना मतदातासँग मत माग्दै एक अपील जारी गर्नु भएको छ। साथै, बेलायतमा बसोबास गर्ने सम्पूर्ण नेपाली समुदायसँग पनि उहाँले सक्रिय सहयोगको अपेक्षा गर्नु भएको छ।
No comments:
Post a Comment