कविता: धान दिवसको शुभ कामना !
- डा बच्चु कैलाश कैनी
न खेतमा टेकेको छु
न धान रोपेको छु
न गोडमेल नै गरेको छु
न कहिले धान काटेको छु
न पराल नै बोकेको छु
तरपनि आज सबेरै धान दिवसको
शुभ कामना पोस्ट गरेको छु।
आजकल हाम्रो घरमा
मित्र राष्ट्रबाट आयातित चामल छ
मलाई थाहा छैन
चामलको भाऊ कति छ
मेरा छोरा छोरी लाई थाहा छैन
धान कसरी फल्छ
चामल कसरी बन्छ
सबैलाई यति भने थाहा छ
देशमा चरम गरिबी छ
हाम्रो खेतबारी बाँझो छ
म बढी कुरा किन गरुं?
हजुरहरु सबैलाई
धान दिवसको शुभ कामना छ।
आइतबार, १५ असार २०८२
(२९ जुन २०२५)
डार्टफोर्ड, बेलायत।
No comments:
Post a Comment